(Vestnes Varfjell - Bud/Bryn 0-2) Vestnes Varfjell gjekk på årets første tap i 5. divisjon då Bud/Bryn stakk av med alle poenga frå Vestnes idrettspark laurdag. I ein jamn og tett toppkamp var gjestane mest effektive. Heimelaget hadde meir enn nok sjansar til å greie minst uavgjort, men fekk aldri ballen i mål.
Heile 250 tilskuarar såg kampen, mange av dei frå Hustadvika. I tillegg var det mange barn som før kampen fekk delta på aktivitetar i "fanzone".
Det var tydeleg at mykje sto på spel i det som var ein tidleg "seriefinale" i 5. divisjon. Gjestane frå Hustadvika følte nok at dette var ein kamp dei måtte vinne medan heimelaget ville halde føringa om førsteplassen også med uavgjort. Begge lag gjekk ut med full innsats. Heimelaget kunne fått ei drøymeopning då William Hjelvik kom aleine med keeper alt etter fem minutt, men den duellen gjekk i favør målmannen som varta opp med den første av det skulle bli mange redningar.
Bud/Bryn tok no meir over og etter ein tapt duell på midtbanen hamna ballen i bakrommet der Matheo Midthaug kunne sette ballen forbi Egil Dalhaug i Varfjell-buret. Då var det spelt 13 minutt.
Skåringa prega kampbildet i resten av kampen. Gjestane var flinke til å drepe forsøka frå heimelaget, samtidig som dei var farlege når dei fekk sjansen. Etter 27 minutt måtte Dalhaug varte opp med ei god rending for å hindre ny baklengs.
Først mot slutten av første omgang kom heimelaget fram til store sjansar. Først hadde Didrik Sæter ei avslutning som strauk på feil side av stolpen etter 44 minutt før same mann, William Hjelvik og Leo Krogseth hadde kvart sitt forsøk i ein trippelsjanse. Alle forsøka traff Bud/Bryn si forsvarslinje.
Den gamle storskåraren Elling Olafsen var tilbake frå skade då han kom inn som innbyttar etter pause. Det gav Varfjell-angrepet meir musklar. Leo Krogseth hadde ein god periode etter timen. Då skaut han først eit frispark frå hjørnet av 16-meteren like over før han avslutta eit soloraid med skot på keeper.
Så kom to verkeleg store sjansar. 66 minutt var spelt då Hjelvik fann Olafsen framom mål, men avslutninga gjekk like utanfor. Så var det Tommy Kanishi som kjempa fram eit innlegg, Didrik Sæter var mottakar av innlegget frå dørlinja, men igjen sto keeper i vegen.
Siste sjanse til å berge det eine poenget kom to minutt på overtid. William Hjelvik fyrte laus, men igjen rett på keeper.
Gjestane frå Bud og Hustad hadde berre fyrt av nokre skot i retning Flatevågen i andre omgang, men fire minutt på overtid fekk innbyttar Vegard Helseth sjansen på ei kontring der han plasserte ballen til side for keeper. Dermed endte det skuffande 0-2.
Heimelaget vann kanskje statistikken over store målsjansar, skot på og utanfor mål, cornerar og frispark, men tapte den som tross alt betyr mest: Talet på skåringar.
Vestnes Varfjell skal no ut i fire strake bortekampar, den første mot Nordlandet/Frei torsdag.
KAMPFAKTA:
Vestnes Varfjell - Bud/Bryn 0-2 (0-1)
5. divisjon Nordmøre og Romsdal, laurdag 12. september 2026 kl 15
Vestnes idrettspark, 250 tilskuarar
Mål:
0-1 (13) Matheo Midthaug
0-2 (90 +4) Vegard Helseth
Dommar: Eirik Hyldbakk Furu, FCK
Assistentdommarar: David Mircea Rus, Elnesvågen og Harald Vebenstad, AK
Gult kort: Vegard Væge Nekstad (45) og Kristian Fliittie Onstad (eller Svein Erik Lange Male) (66), Vestnes Varfjell. Bertil Kjørsvik, Bud/Bryn (75)
Vestnes Varfjell (4-3-3):
1 Egil Dalhaug
11 Sverre Olgar Lindset
22 Torstein Væge Nekstad
23 Svein Erik Lange Male (K)
27 Kristian Flittie Onstad
24 Didrik Selnes Sæter
80 Tommy Kanishi Andreassen
7 Tor-Bjarne Løvik Salte
90 Casper Rolf Hellstrøm Andreassen
20 William Pedersen Hjelvik
10 Leo Villa Krogseth
Innbyttarar:
77 Elling Furland Olafsen 46. min for Casper Andreassen
90 Casper Rolf Hellstrøm Andreassen 73. min for Sæter
25 Henrik Leao Tomren 81. min for Salte
9 Magnus Nerheim 86. min for Lindseth
Ikkje benytta:
12 Carlos Felipe Gonzalez
2 Håkon Ødegård Kjørvik
3 Ole Alexander Mekvik Ulvestad
17 Florian Hill
