(Vestnes Varfjell - Midsund 0-1) Kvelden starta med feiring av klubbens 125-årsjubileum i Vestneshallen. Også i den påfølgande fotballkampen var Vestnes Varfjell gjestmilde.
Midsund kom til Vestnes med ein potensiell opprykkskvalik i sikte. Då måtte det helst bli poeng mot eit heimelag som alt hadde rykka ned til 5. divisjon.
Heimelaget solgte seg som vanleg dyrt. Midsund, som hade skåra 20 mål på dei to siste kampane, måtte nøye seg med ei nettkjenning. Den var til gjengjeld av det fine slaget. Simon Moe fekk fulltreff og ballen suste inn i lengste hjørne etter eit skot frå 20 meter 35 minutt ut i kampen.
Vestnes Varfjell skapte lite før pause, men kom betre med i andre omgang. Då var det nokre oppløp som kunne blitt farleg. Laget hadde også fleire frispark frå god posisjon og cornerar, men alt rann ut i sanden.
Midsund hadde heller ikke kvelden, bortsett frå eit skot som strauk stolpen, var det sjeldan farleg. Langskota hamna alle i nota bak mål.
Dramatikken i kampen starta først på overtid. Lystavla viste berre 88 minutt då dommar Øystein Lysø blåste av. Det skapte protestar frå heimelaget, men forklaring var at klokka vart sett i gang for seint til andre omgang. Uansett viste det seg at Midsund hadde fått "innvilga" at kampen skulle blåsast av på 90 minutt om kampen var avgjort då fordi dei skulle rekke ei ferge etter kampen! No var det kanskje ikkje så mykje å legge til uansett, men 2-3 minutt på grunn av bytte og eit par mindre skadesituasjonar var det jo.
"Kampen var avgjort, dere skapte ikkje ein sjanse!" lød det frå ein Midsund-leiar som tydelegvis meinte det var rett å blåse av på stillinga 0-1. Han hadde sikkert rett, men dette var ein merkeleg situasjon me ikkje kan huske å ha sett før. Også dommatrioen skulle med same ferga, men den gjekk ikkje før klokka 21.45 - ein halvtime etter kampslutt.
Både Svein Erik Lange Male og Emil Sjøvik fekk sjå det raude kortet i tumultane som oppsto.
Dette var siste heimekamp for sesong og skulle ha vore sesongavslutninga. Men Vestnes Varfjell har enno ikkje spelt den rasfare-utsatte kampen mot Sunndal. Spørsmålet er om eller når den blir spelt. Laga skal ha fått fjorten dagar på seg til å finne ein data og få avvikla kampen. For Vestnes Varfjell blir det vanskeleg å stille lag midt i veka, medan Sunndal visstnok skal på tur til Polen ...
Midsund på si side må vente på Træff si skjebne i 2. divisjon. Rykker dei ned, får ikkej Træff 2 spele kvalik og plassen går til Midsund. Motstandar i kvaliken var også klar fredag. Det blir Herd sjølv om våre gode naboar over fjellet, Stordal/Ørskog, tok heim pokalen i 4. divisjon på Sunnmøre. Laget kan ikkje rykke opp sidan det er eit samarbeidslag. Gratulerer uansett!
KAMPFAKTA:
Vestnes Varfjell - Midsund 0-1 (0-1)
4. divisjon Nordmøre og Romsdal, fredag 17. oktober 2025 kl 19.30
Vestnes idrettspark, 120 tilskuarar
Mål:
Simon Gautun Moe 0-1 (35)
Dommar: Øystein Lysø (Surnadal IL)
Assistentdommarar: Johannes Dahlberg og Håkon Skram, begge Frei FK
Raudt kort: Svein Erik Lange Male, Vestnes Varfjell (90+) og Emil Ovesen Sjøvik, Midsund (90+)
Gult kort: Leo Krogseth (54) og Knut Stian Eik (71), Torstein Væge Nekstad (78), Vestnes Varfjell. Leander Tusa, Midsund (71)
Vestnes Varfjell (3-5-2): Egil Dalhaug - Ørjan Tangen, Kristian Flittie Onstad, Jo Sigurd Vold - Leo Villa Krogseth, William Pedersen Hjelvik, Sverre Olgar Lindset, Vegard Storsæter Ellingseter (Torstein Væge Nekstad 75.), Håkon Ødegård Kjørvik - Svein Erik Lange Male, Knut Stian Eik (Andreas Hole 89.)
.jpg)
