Vestnes Varfjell og Elnesvågen møttest til skikkeleg botnoppgjer i 4. divisjon torsdag kveld. Dessverre endte det for heimelaget i nytt tap, det sjuande på rad i serien. Gjestane frå Fræna vann fortent, dei var hakket betre i avgjerande fasar. Det sto 2-0 til Elnesvågen ved pause. Elling Olafsen reduserte til 1-2 i andre omgang då han tråkla seg fri og sette ballen ned ved stolpen. Det gav heimelaget trua, men Elnesvågen var farleg på kontringar og utnytta feil i Varfjell-forsvaret slik at det til slutt sto 1-4 på resultattavla. Også Elnesvågen har slete i starten på sesongen, men til denne kampen hadde dei fått tilbake viktige spelarar som Peter Berg Hestad. Lillebroren til Daniel, styrte mykje av det kreative angrepsspelet og var også sist på ballen i eit mønsterangrep som gav 0-2. Olafsen hadde også heimelagets beste sjanse før pause då eit skot strauk stolpen. I andre omgang sette Amund Stavem ballen knallhardt i krysset på stillinga 1-3. Best på heimelaget var målvakt Adrian Gabrielsen, som er tilbake frå skade og varta opp med fleire fine redningar. Ros også til back Håkon Kjørvik som løyste si oppgåve med glans trass i at han hadde ein gutekamp i beina frå dagen før. Elles var det igjen ein kamp prega av for mange personlege feil frå heimelaget. Sjølvtilliten er ikkje den beste, naturleg nok. Laget heng ikkje godt nok saman og det blir for mykje "ein og ein" framover. Neste kamp er borte mot eit anna botnlag, Tingvoll. Det blir nok ein tøff kamp då dei også må vere minst like lystne på årets første trepoengar. BILDEGALLERI FRÅ KAMPE HER
Laget: Gabrielsen; Magnus Nerheim, Yngve Solevågseide, Svein Erik Lange Male, Karl-Edvard Bredeli (Håkon Kjørvik 12.) - Sivert Nerheim, Vegard Ellingseter (Adrian Liabø 64.), Christian Mario Leikarnes (Juan Larsen 35.) - Azim Ahmadi, Elling Olafsen, Amund Stavem (Ellingseter 84.)
Gult kort: Magnus Nerheim (70)
