Tidlegare Varfjell-spelar Harald Innli (f. 21. august 1961) er død, berre 62 år gammal. Han døydde brått heime på Vestnes 4. mars. Innli var ein markant spelar for Varfjell i åra 1980-1991 då han skåra 102 mål på 172 kampar i serie og cup.
Innli markerte seg alt som gutespelar heime i Isfjorden. Her nådde han avisoverskriftene då han skåra 31 mål på to kampar for Isfjorden i 1976: 16 mot Rekdal og 15 mot Tomrefjord.
I 1979 vart han henta til Åndalsnes, men alt året etter tok kjærleiken han til Vestnes. Då var ikkje vegen til A-laget på Varfjell lang, og med unntak av ein halv sesong for ÅIF i 3. divisjon i 1983, spelte han samanhengande for Varfjell fram til han la opp etter 1991-sesongen.
Den raske og teknisk gode spissen var fleire år lagets toppskårar. I 1985 vart han toppskårar i 5. divisjon avdeling Romsdal og fekk trofé frå Romsdals Budstikke. Sju gongar noterte han seg for hat-trick, altså tre mål i same kamp. Innli var også ein habil handballspelar for Isfjorden IL.
Me lyser fred over minnet. Det blir bisetting frå Vestnes kyrkje onsdag 13. mars kl. 13.
