Vestnes Varfjell fekk det som vanleg tøft mot Træff 2 og tapte 4.-divisjonskampen på Reknesbanen fredag kveld. Laget hang godt med spelemessig i ein periode før og etter pause, men eit sterkt Træff 2-lag var klart best framføre mål og vann fullt fortent 5-0.

 

 

 

Vestnes Varfjell har i haust merka at stallen ikkje er den same som i vår då laget dominerte i 4. divisjon. Spelarar har gått til andre klubbar og til denne kampen var det også eit par forfall grunna skade og sjukdom. Førsteellevaren var likevel bra, men i kveld var det rett og slett ikkje nok mot eit Træff-lag med ei angrepsrekke beståande av spelarar som Thomas Flemmen, Radek Bugaj og Stian Rødal. Legg til Bertil Kjørsvik på midtbanen og du har eit halvt lag som kunne spelt på eit lag i 2. divisjon.

 

Det var likevel eit anna kjent fotbalnamn, Øystein Sletvold, som fekk æren av å skåre først denne kjølige seinsommarkvelden på Reknesbanen. Veteranen fekk stå heilt umarkert og heade inn 1-0 etter eit kvarter.

 

Vestnes Varfjell-forsvaret hadde nok med å forsvare seg tidleg i kampen, men spelet jamna seg ut etter kvart og laget spelte seg til nokre sjansar. Nærast kom Tommy Kanishi. Kapteinen var aleine med keeper etter 24 minutt, men skotet vart redda. Returen hamna hos Amund Stavem, men ein Træff-forsvarar redda neste forsøk på streken.

 

I staden sto det 2-0 etter ein halvtime, der det var litt kommunikasjonssvikt mellom målvakt og forsvar. Radek Bugaj let seg ikkje be to gongar og sette ballen enkelt i det tomme målet. Karl Arne Stokkeland, Nirut Mjøs og Elling Olafsen (frispark) hadde skotforsøk, men det vart ikkje fleire mål før pause.

 

Vestnes Varfjell starta best etter kvilen, men greidde ikkje å spele seg fram til dei heilt store sjansane. Træff 2 var farlege på kontringar. Alexander Aarø hindra ny skåring etter ei fantastisk dobbeltredning, men kunne ikkje hindre Bugaj i på skåre sitt andre for kvelden etter ein drøy time. Polakken, som var toppskårar i 3. divisjon med Sunndal for nokre sesongar sidan, sprang igjennom på ei kontring.

 

No gjekk litt av lufta ut av Vestnes Varfjell, og Træff 2 fekk lov til å skåre to mål til før kampen var over. Etter 77 minutt var Eirik Kavli Franzen sist på ballen etter at Vestnes Varfjell-forsvaret var utspelt på nok ei kontring. Like før slutt var Yngve Solevågseide uheldig med ei klarering som hamna i eit Træff-bein og til slutt endte i kampens siste mål.

 

Træff 2 hadde langt fleire sjansar og det var ikkje noko å seie på at det til slutt vart 5-0. Nærast skåring for Vestnes Varfjell etter pause var Vegar Skare, men avslutninga frå bakre stolpe hamna utanfor.

 

Ikkje noko å seie på innsatsen i kveld, men det heldt rett og slett ikkje mot eit så godt Træff 2-mannskap.

 

Kampfakta:

Træff 2 - Vestnes Varfjell 5-0 (2-0)

Seriekamp 4. divisjon Nordmøre/Romsdal

Reknesbanen (kunstgras), fredag 31. august 2012 kl 19.30

20 tilskuarar (6 Vestnes)

MÃ¥l:

1-0 (15) Øystein Sletvold

2-0 (30) Radek Bugaj

3-0 (62) Bugaj

4-0 (77) Eirik Kavli Franzen

5-0 (88) Kavli Franzen?

Dommar: Jan Roger Strømsvåg, Sunndal

Gult kort: Radek Bugaj, Træff 2 (44)

Vestnes Varfjell (4-3-3): Alexander Aarø; Yngve Solevågseide, Svein Erik Lange Male, Nirut Mjøs, Magnus Nerheim - Trond Klokset (Ronny Leikarnes 65.), Karl Arne Stokkeland, Vegar Skare - Amund Stavem (Azim Ahmadi 75.), Elling Olafsen, Tommy Kanishi Andreassen